Οἵδαμεν Δέσποτα, ὅτι αἱ ἁμαρτίαι ἡμῶν ὑπερῆραν τάς κεφαλάς ἡμῶν καί διά τοῦτο ἀπέστημεν τῆς χάριτος καί τοῦ ἐλέους Σου. Ἀλλ᾿ ἱκετεύομεν καί παρακαλοῦμεν τήν Σήν συμπαθεστάτην ἀγαθότητα  μή μνησθῇς τῶν ἀνομιῶν ἡμῶν˙ μή ἀποστήσῃς τό ἔλεός Σου ἀφ᾿  ἡμῶν, ἀλλ᾿  ἐλέησον ἡμᾶς κατά τό πλῆθος τῶν οἰκτιρμῶν Σου.

Ταῖς πρεσβείαις τῆς Παναχράντου καί Πανυπερευλογημένης  Θεοτόκου Μαρίας καί πάντων τῶν Ἁγίων δός τῷ λαῷ Σου βαθείαν
καί ἀναφαίρετον εἰρήνην καί διαφύλαξον αὐτόν ἐκ τῶν ἐπιβουλευομένων ἡμᾶς. Ἐάν δέ οἱ
ἐχθροί ἡμῶν γείτονες προσβάλωσιν ἡμᾶς, ἐνίσχυσον τόν στρατόν ἡμῶν ἐν ὥρᾳ πολέμου καί ἐνδυνάμωσον αὐτόν. Γενοῦ μεθ᾿ ἡμῶν μαχητής ἰσχυρός, ὅτι οὐκ ἀδυνατεῖ παρά Σοί σώζειν ἐν πολλοῖς καί ἐν ὀλίγοις. Κατίσχυσον ἡμᾶς, Κύριε ὁ

Θεός ἡμῶν, ὅτι ἐπί Σοί πεποίθαμεν καί ἐπί τῷ ὀνόματί Σου τεθαρρήκαμεν. Πιστωθήτω δή τό ῥῆμά Σου Κύριε, ὅ ἐλάλησας πρός ἡμᾶς, ὅτι μεθ᾿ ἡμῶν εἶ πάσας τάς ἡμέρας ἕως τῆς συντελείας τοῦ αἰῶνος. Ὑψωθήτω τό κέρας τῶν Χριστιανῶν
καί καταισχυνθήτωσαν οἱ διώκοντες καί ἐκφοβοῦντες ἡμᾶς ἄθεοι Ἀγαρηνοί
καί πτοηθήτωσαν καί ἐντραπήτωσαν καί ἀπωλέσθωσαν καί συντριβήτω ἡ ἰσχύς αὐτῶν καί ἡ δυναστεία αὐτῶν μή ὑπαρξάτω.

Γνώτωσαν ἅπαντες, Δέσποτα, ὅτι τῇ δυνάμει Σου τῇ κραταιᾷ καί τῷ βραχίονί Σου τῷ ὑψηλῷ ὑπερισχύομεν τῶν ἐχθρῶν ἡμῶν, διότι Σύ εἶ ὁ σωτήρ ἡμῶν, ὁ μόνος ὕψιστος καί δυνατός, καί Σοῦ ἐστίν ἡ βασιλεία καί ἡ δύναμις καί ἡ δόξα, τοῦ ἀνάρχου Πατρός καί τοῦ Συνανάρχου Υἱοῦ καί τοῦ Ζωοποιοῦ Πνεύματος, νῦν καί ἀεί, καί εἰς τούς αἰῶνας τῶν αἰώνων. Ἀμήν.